Яман хасиятланы яхшы янлары

Рашит ГЬАРУНОВ

Оьзюн кеп сюегенлик
Сююв оьзю яхшы ва татли аламат. «Сююв – яшавну маънасы», – дейгенлер де бар. Тек оьз-оьзюне гьашыкълыкъ макъталгъан къылыкъ тюгюл. Озокъда, къайсы адам да оьзюн сюе, оьзю-оьзюне душман болмайдыр. Тек шо сююв гьатдан озуп гете буса, эрши герюне. Гючлю болгъан сайын ону эршилиги де арта.

Оьзюн кеп сюеген адам (къысгъартмакъ учун «оьзсюер» деп къояйыкъ) айланасындагъыланы гьар айланышын оьзю булан байлай, гьар айтылагъан сез янгыз оьзю учун айтылагъандай гьисап эте. Ол гьар агьвалатгъа, адамгъа гюзгюге йимик къарап, шоларда оьзюн гере. Оьзю сюймейген агьвалат болса, ону генгю бузула. Бирев оьзюн сюймейгенни англаса, ичине алатолпан тюше ва нетип де шо адамны сюювюн къазанма къарап, кюлкюлю гьалгъа да тюшеген гезиклери бола. Оьзюн сюегенлени алдында да ону къоркъунчу бар: бирден олар муну сюймейген болуп къалса? Шону учун «оьзсюер» оьзюн сюегенлени сюювюн тас этме къоркъагъанлыгъындан олагъа ярайман деп, оьзюн ярахсыз эте.
Мажлисде олтургъан ерде оьзюн сюймейген адам бар буса, «оьзсюер» сувдан чыгъарып ягъагъа ташлангъан чабакъдай гьалгъа тюше. Ол оьзюню сюювюню къулу экенге, гьар заман айланадагъылар оьзюне тергев берип тургъанны сюе. Шону учун ол сагьнаны, микрофонну къурдашы, гьар ерде оьзюню аты-фамилиясы болгъанны сюе. Ол оьзюню гьар уьстюнлюгюнден къувана ва айланасындагъыланы да шо къуванчгъа къуршай.

«Оьзсюер» оьзюнден пагьмулу, уьстюнлю адамны гетерип болмай, ичинден ону гюллей, бола буса, ачув да эте. Тек ол оьзю этеген яман, эрши-осал ишни башгъалар билип къоярдан сакъ: о заман яман ишлери саялы гезден тюшме бола чы. Шону учун «оьзсюерни» ачуву-оьчлюгю де къоркъунчлу болмай. Ол узакъгъа ачув тутуп да бажармай. Неге тюгюл, ачувлу-оьчлю адам оьзюн унутуп да, бир яманлыкъ этип, мурадына етмей токътамай. «Оьзсюерни» буса, гьатта мурадына етмек учун да заманын оьзюне сюювден къайры затгъа багъышлама кюю екъ.

Муна шунда «оьзсюерликни» яхшы яны: ону учун биринчи ерде сююв. Къайырмас, шо сююв оьзюне бакъдырылгъан буса да ярай. Оьзюне гьашыкъ адам башгъалагъа да яхшы болма къарай. Адамланы сюювюн сенме къоймайман деп, ол яхшы да, чомарт да, шат да, яравлу-гелишли де болма къаст эте. Шо къасты булан ол кеплеге сююнч, шатлыкъ гелтире, яшавну ялкъывун кемите, дюньяны тюрлендире. Халкъгъа «оьзсюерден» болагъан зарал екъ. Шону учун ону оюнларын, ролларын ондан гечейик.
Гертилей де, гьар адамны да оьзюне сюювю болмаса ярамай. Оьзюне сюювден башлана башгъалагъа да, яшавгъа да сююв. Оьзюн сюймейген адам оьзгелени сюе десе де, инанма къыйын.

Сюювден уллу гьис екъну англамайгъанлар аздыр. Шо гьакъда шаирлер, философлар ва оьзге тюрлю гьакъылтебелер кеп язгъан ва айтгъан. Сюювлени де бар нече тюрлюсю де: ата-анагъа, авлетлеге, Аллагьгъа, табиатгъа, гезел тиштайпагъа, касбусуна, адамурлукъгъа ва башгъалары. Тек шо сюювлени бири де болмай, эгер адам оьзю-оьзюн бираз сама сюймей буса. Лап уллу сююв де адамны оьзюне сюювюнден башлана.

Лакъырыбызны аслу ери – оьзю-оьзюне сююв гьатдан озуп артыкъ болма тюшмей. Шо сююв артыкъ бола, эгер халкъ шону эслей буса.

Бирев де шекленмейген кюйде оьзюн сюймек буса эрши хасият тюгюл.


Рашит ГЬАРУНОВ

Елдаш Газет




    03 Aug 2013 |   Баянлыкъ: 0 | Къаравны санаву: {view}


 
 


Content Management Powered by CuteNews