ТОЙЛАРДА, ТАЗИЯТЛАРДА…

Яшавда тойларда да, тазиятларда да болмагъа тюше. Тек, шолай ерлерде биз оьзюбюзню тутуп, сакълап болмайгъаныбыз нече де эрши гёрюне.


Алайыкъ тойланы.

Мен башгъа миллетлени тойларында кёп боламан, болгъанман. Тек, бизин тойларда йимик халкъ ичеген ерлени кёп аз гёргенмен.

Айтагъаным, айрокъда юртдагъы тойларда, гьаракъы ичеген яш адамлар эпсиз кёп. Тойгъа барагъанланы кёплерини оюнда гьаракъы. Уллу да иче, яш да иче. Ичген адамлар оьзюн тутуп болмай. Эришив, ябушув болагъан гезиклер кёп ёлугъа. Тойда ичип бичакъ уруп яралангъанланы да гёргенбиз.
Тойларыбызда къатынгишилени гийинивюне къарап мен нече керен гьайран болгъанман. Кёплерини башлары ачыкъ, чачлары йиберилген, гийген капотлары, кофталары нече де къысгъа, инбашлары ва тёшю ачылгъан. Оланы гийинивю Бразилияда яшайгъанланы гийимине ошай.

Тойланы ичинде низам ёкъ. Ким не сюйсе эте. Бирлери барып согъулагъан музыканы токътата, бирлери сокътура, микрофону алып эсирген гьалында не сёйлейгенни билмей. Сонг уьстевюне йырлама да къарай. Бу бизин культурабыз тюпде экенни гёрсете.

Гелин алма барагъан кортежлер де машинлени яман къувалап гьайдайгъанны барыбыз да гёребиз. Машин гьайдайгъанланы кёбюсю ичгенлер. Гелин алма барагъанланы санаву къумукъ тойларда эпсиз кёп. Негер тарыкъ онча халкъны йиберме?

Той столларда не аш сюйсенг бар. Барлар да сала, ёкълар да салма къаст эте. Не этсе де тойларда ашлар кёп зая бола.

Бийивлер. Залны ортасында бир-биревню теберип дегенлей бийийлер. Эки-уьч чер (пара) чыгъып бийисе арив болур эди.


Гьали гелейик тазиятлагъа.

Тазият Адам оьлген абзарда гьали уьч гюн оьтгериле. Шо гюнлени ичинде де тазиятда оьзлени тутуп болмайгъанлар кёп бар. Бирлери къычырып сёйлейлер, бирлери кюлейлер. Неге кюлемесин да, анекдотлар айтыла буса?

Шо эрши ва айып зат. Бирлери бав якъгъа да барып, сигарет де тартып гелип ортагъа «Дуа этигиз» деп эре туруп къалалар.

Ясларда оьмюрю сексенден оьтюп яшавдан гетгенлеге къатынлар сарнап йылайлар. Бир гезик, бир имам гирип: «Бу сизге сарнайгъан хорму?» деген. Озокъда, ювукъ адамы оьлген ерде йыламай, къайгъырмай болмай. Ону да, шариат булан этилеген кюйлери бола. Шо билмейгенлер де кёп бар.

Шатлыкъ ва къайгъы оьтгерилген ерде гьар ким оьзюн тутуп болма герек.
Шону, ёлдашлар, унутмайыкъ.


Измулла ГЬАЖИЕВ




    25 Sep 2012 |   Баянлыкъ: 0 | Къаравны санаву: {view}


 
 


Content Management Powered by CuteNews