Къумукълардан биринчи юзювден спортну устасы

Руслан Сатаев

Къумукълардан кеп айтылгъан спортсменлер чыкъгъан.
Амма, юзювден Россияны спортуну устасы ва чемпион атны къазангъанны эшитмеген эди. Борагъанлы Арсланбек Мамаев шолай адам булан мени таныш этди. Ону булан охувчуланы мен де таныш этме сюемен.

Руслан Сатаев Гюйдюрмес районну Борагъан къумукъ юртундан. Огъар 16 йыл бола. Ол Волгорад областны Камышин деген шагьарында яшай ва ондагъы 6 номерли школада да охуй. Юзюв булан мащгъул болагъаны тогъузунчу йыл.

Башлап ол Камышин сонг Волгоград шагьарланы чемпиону бола. Уьч йыл алда Къыбла Федерал округну чемпионатында борагъанлы улан брасс стилде 50 метрлик мезгилде биринчи ерни къазангъан.
Олимпия оюнланы уьч керен чемпиону Евгений Садовойну савгъатларына оьтгерилген ярышларда къумукъ улан уьч керен уьст гелген.

Ону ингде уллу уьстюнлюгю 2010-нчу йылда Пенза шагьарда оьтгерилген яшланы арасында Россияны чемпионатында чемпион болгъан. 2011 ва 2012-нчу йлларда Россияны чемпионатында эки керен бронза медаллар къазангъан. Гетген йыл Руслан Волгоградда охувчу яшланы арасында оьтгерилген бешинчи яйлыкъ Спартакиада да буса уьчюнчю ерге ес болгъан. Гетген йыл Россияны чемпионатында Руслан 4 по 100 метр мезгил эстафета да буса бронза медаль къазангъан.

- Мен аслу гьалда брасс стиль булан 50 метрге юземен. Тек, гьали комбинированный эстафетагъа да къошулуп юземен. Эстафета юзюв къыйын тек бек къужурлу оьте. Артдагъы йылны ичинде шону ушатып да къойдум. Мен юзювде уллу уьстюнлюклеге етме сюемен - дей Руслан.

Ол Камышин шагьарны башчысыны стипендиаты дюр ва бу йылгъы конкурсда «Ингде яхшы охувчу» атны да утгъан.

- Борагъан юртубуздан авур атлетлер, футболистлер ва теннисистлер кеп чыкъгъан. Юзювден юртлубуз Руслан Сатаев Россия оьлчевлерде уьст гелип бизин сююндюрюп тура. Айтагъаным, ону уллу гележеги бар. Я Аллагь, огъар Европаны, дюньяны ва Олимпия оюнларында уьст гелме насип болсун. Ол тутгъан муратларына етежекге инанабыз ва уьстюнлюклер ерайбыз - дей юртлусу Арсланбек Мамаев.

Гелигиз, бизде яш юзювчюден сююнейиклер оьрлюклер ерайыкъ.


Измулла ГЬАЖИЕВ





Танышгъа билдирмек


0


    04 Jul 2013 |   Баянлыкъ: 0 | Къаравны санаву: {view} | Печать этив


  (remember)
  (тарыкъ буса)

Content Management Powered by CuteNews