Яшасын къумукълар, дюньяны чемпионлары

Яшасын къумукълар, дюньяны чемпионлары

Спортда булай уллу уьстюнлюк болагъаны биринчи керен.

Тай боксдан Санкт-Петербург шагьарда оьтгерилген дюньяны чемпионатында къумукъ уланлар 4 алтын ва 2 гюмюш медаль къазанып къайтгъанлар. Уллуланы ва яшёрюмлени арасында оьтгерилген ярышларда дюньяны 102 пачалыгъындан гелип 1200 тайбоксёр ортакъчылыкъ этген. Россияны жыйым командасы умуми команда гьисапда биринчиликни алгъан.



Абдулкерим Салаватов

Гьали, дюньяны чемпионлары булан охувчуланы таныш этме сюемен.
Ингде енгил 45 кило авурлукъда «А» классда Хасавюрт районну Кёстек юртундан Россияны ва СКФО-ну чемпиону Абдулкерим Салаватов финалда таджик тайбоксёр Абдулвосид Борановну утуп дюньяны чемпиону болду. Гетген йыл Узбекистанда оьтгерилген дюнья чемпионатда кёстекли улан экинчи ерни алгъан эди.


Магомедсаид Арсланов

Оьзю хасавюртлу, бугюн Москвадагъы Плехановну атындагъы экономика Академияда охуйгъан, Россияны, Орта федерал ва Москваны эки керен чемпиону Магьамматсайыт Арсланов 48 кило авурлукъда «Б» классда биринчи ер учун Узбекистанны, Азияны чемпионун утуп алтын медалгъа ес болгъан.

- Бир башлап мен тренелериме баракалламны билдиремен. Дюнья чемпионатны алдында Россияны жыйым командасы булан кёп сагьат тренировкалар оьтгерилди. Тайландда мен эки йыл прт артындан гюмюш медаллар алып къайтгъан эдим. Биринчи канзиге минме кёпден берли уллу умутум бар эди ваш о мурадыма етишдимдей Магьамматсайыт Арсланов.


Зайналабид Магомедов

Къаягент районну Гьюсемигент юртундан чыкъгъан дюньяны, Европаны ва Россияны чемпиону Зайналабит Магьамматов 71 кило авурлукъда, финалда айтылгъан белорусслу. Дюньяны 6 керен чемпиону Виталий Гурковну утма бажаргъан ва биринчи ерни алгъан.


Надир Гаджиев

91 кило авурлукъ категорияда «Ботаюртовская» деген спорт школадан Надир Гьажиев ярымфиналда къолу сынса да утма болгъан ва финалда шо авуртагъан къолу булан белорусслу тайбоксёр булан ябушгъан. Бир къолу булан ябушуп пай бермесе де ярышланы судьялары ёлугъувну токътатма борчлу болгъан. Бир къол булан ябушма къыйын экенин айтмаса да англашыла.

- Надир бир къолу булан финалда гёрсетген ябушувгъа къарап залдагъы къаравчулар гьайран болдулар ва харс урдулар. Айтагъаным, Надир къоркъмай, тартынмай сынгъан къолу булан финалгъа ябушма чыкъды. Ол къатты хасиятын гёрсетди. Тек, врачлар ябушувну токътатдылар. Надир гюмюш медаль алгъанына да сююндюм. Амма, къолу сынмагъан буса ол дюньяны чемпиону атны алып къайтажагъына инанадымдеди Санкт-Петербург шагьаргъа ярышлагъа къарама баргъан «Ботаюртовская» деген спорт школаны директору Абакар Абуков.

Яшёрюмлени арасында 71 кило авурлукъда магьачкъалалы Гьажимурат Амиржанов дюньяны чемпиону болду. 91 кило авурлукъда, хасавюртлу Темирлан Исмайылов гюмюш медаль къазанды.

Хасавюртлу Магьамматсайыт Арслановну, Агьмат Хочбаровну ва ботаюртлу Надир Гьажиевни къаршылама Магьачкъала аэропортгъа кёп халкъ жыйылгъан эди. Чемпионланы йырлар, бийивлер макътавлу сёзлер булан арив къаршыладылар.

Шагьар Жыйынны председателини биринчи заместители Мугьажир Салагьбеков чемпионланы къаршылай туруп булай деди:
- Дюньяны чемпионлары болуп гелген бизин яшланы кёп сююп къаршылайбыз. Уллу ярышларда уьст гелме озокъда тынч болмагъандыр. Алтын медаллар къазанып сиз бизин сююндюрдюгюз. Алдын бизин шагьарлы кочаплар уллу уьстюнлюклеге кёп етгенлер. Муна бугюн буса биз тай боксдан дюньяны чемпионларын къаршылайбыз.

Къутлав сёзлерден сонг чемпионланы бийивю де болду. Уллу автомобиль кортеж дюньяны чемпионлары Магьамматсайыт Арсланов ва Хочбар Айгубовну Хасавюртгъа алып гелди.

- Уланым финалда узбек яш булан ябушагъан вакътини ичинде эре тургъан еримде парахат туруп болмай эдим. Янымда тургъан Абакар булан «Ур!» «Вёре къойма!» деп турдукъ. Насипге Магьамматсайыт утуп мени ва бары да къумукъ халкъны сююндюрдю, оьр этди.

Дюнья чемпионатны Спорт къаланы ичине гирип къарамагъан адам ярышланы юрюлеген кюйню англамажакъ. Ярышлар бек къужурлу оьтдю. Дюньяны, Азияны, Американы ва Европаны ингде айтылгъан тайбоксёрлары ябушагъан кюйню гёрдюм. Ингдеси, Россияны жыйым командасында дёрт яш къошулгъаны ва оланы уьчевю алтын медаллар къазангъаны кёп затны англатадеди Хасавюрт шагьар администрацияны башчысы Арслан Арсланов.


Измулла ГЬАЖИЕВ





Танышгъа билдирмек


0


    19 Sep 2012 |   Баянлыкъ: 0 | Къаравны санаву: {view} | Печать этив


  (remember)
  (тарыкъ буса)

Content Management Powered by CuteNews