Акъ халатыдай таза

Лейла Алиева

Докторланы касбусу – халкъ учун лап да герекли касбу. Неге тюгюл де, оланы пагьмусундан ва бажарывлугъундан адамны яшаву ва савлугъу гьасил болагъаны герти. Шолай, арабызда бары пагьмусун, гючюн салып чалышагъан акъ халатлылар кеп бар экени бизге белгили. Шоланы арасында Лейла Алиеваны да эмли къоллары баргъа шеклик этмейбиз.
Лейла халкъ арада саламат, асил къылыкълы, ким булан да къыйышып билеген адам гьисапда да танывлу. Лейла Токътахановна оьзюню ишин сююп, касбусуна бютюнлей тюшюнюп, бары да гючюн ва гьюнерин салып загьмат тегеген врач.

Лейла Буйнакск районну Эрпели юртлу Токътахан Токътахановну агьлюсюнде тувгъан. Токътаханны дос-къардашыны ва таныш-билишини арасында Даяв деп таный.

Токътахан асгер къуллугъундан сонг Южносухокумскиге нап батагъалагъа ишлеме гете. Жагьил улан нап батагъаларда ишлейген орус къызъяш Валентинагъа гез сала, ону бек ушата ва сююп де къала. Узакъ къалмай жагьиллер уьйлене. Бу шагьарда ишлейген вакътиде, 1971-нчи йылны июнь айыны 14-нде, буланы агьлюсюнде Лейла тува. Бираз заман гетип, Токътаханны уьягьлюсюне Магьачкъалагъа гечме тюше. Лейла уллу бола ва оьсе. Ол 1988-нчи йылда тахшагьарыбызны 4 номерли орта школасын оьр къыйматлагъа охуп битдире. Кеп ойлашмайлы, гиччиден доктор болма гьасирет Лейла мурадына етише. Шо йыл Дагъыстан медицина академиягъа охума тюше ва 1994-нчю йыл врач касбугъа ес бола.

1995–1996-нчы йыллар педиатриядан интернатураны битдире. Оьр охув ожакъны дипломун алгъан Лейла загьмат елун Магьачкъала шагьарда яшланы республика больницасында врач-эндокринолог гьисапда башлай. Жагьил къыз оьзюню ишин кеп сююп, бары да гючюн ва гьюнерин салып дегенлей загьмат теге. Айланасындагъылар Лейланы къастлыгъын, ишин яхшы билегенлигин эс этелер. Айтагъаным, гьакъ юрекден берилип, аврувлагъа гьайлы кюйде янашагъанлыгъы биринчи гюнокъ да герюне. Иш елдашларыны ва аврувланы арасында абур-сыйгъа ес бола. Шо саялы да болма ярай, кеп де гетмейли, Лейланы оьзю ишлеп турагъан эндокринология белюгюню заведующийи этип белгилей. Бу жаваплы ишинде ол 5 йыл чалыша.

Лейла Токътахановна булан бирче ишлейген Дагъыстан медицина академияны эндокринология кафедрасыны доценти, ДР-ни ат къазангъан врачы Зарема Магьамматова иш елдашыны гьакъында булай хабарлай:
– Лейла Алиеваны мен 1995-нчи йылда яшланы республика клиника больницасында эндокринология белюгюнде ишлейген вакътисинден берли таныйман. Бизин студентлер булан бирче дарсларыбыз шонда юрюле эди.
Таныгъан гюнден башлап, жагьил доктор оьзюн тутуп билегенлиги, гьакъылы, ойлашып сейлейгенлиги, ону илиякълыгъы, авруйгъан яшланы багъагъан кюю мени тамашагъа къалдыра эди. Шо саялы болма да ярай, Лейла Токътахановнаны ишде сынаву аз буса да, жагьиллигине де къарамай, бир генгюлден шо белюкню заведующийи этип де сайлагъаны. Ишлеген заманыны ичинде Лейла Токътахановна оьзюню елбашчылыгъыны тюбюнде коллективин бирикдирип, сыкълашдырып чалышма бажарды. Англавлу касбучу гьисапда оьзюн янгыз яхшы якъдан тюгюл герсетмеди. Авруп ятгъанланы, коллективни арасында да абуру бар эди ва ону барысы да кеп де сюе эди.


2001-нчи йылда агьлю масъалалагъа байлавлу болуп къысмат Лейла Токътахановнаны Пятигорск шагьаргъа чыгъара. Ол кеп сюеген ишин къоймай. Пятигорск шагьарда айтылынгъан «Родник» деген санаторийде врач-эндокринолог, сонг да аслу касбусу булан янаша шо шагьардагъы «Эндокринология» центрны директоруну заместители этилинип белгилене.
Къайда ишлесе де, акъ халатлыларда болма тийишли лап герекли хасиятларындандыр, Лейла – татли, йымышакъ, йылы сезю булан кимге де кемек этме, кимни де къуллугъун битдирме къаст этеген, гелишли ва борчларына намуслу янашагъан адам. Ол, тарыкъ болса, насигьат алма ва сорама бир де уялмагъан. Насигьат сезлеге тынглап, гьасил чыгъарып да биле.

Л. Алиева эсгереген кюйде, сав дюньяда, шону ичинде Дагъыс­танда да, юрек ва къантамурланы аврувларындан, талав (рак) аврувлардан сонг эндокринология (безлери шишегенлик, артыкъ семизлик, шекер ва шолай башгъа тюрлюлери) аврувлар лап да яйылгъан деп гьисаплана.
Шо гьакъда Лейла Токътахановна айрокъда Кавказда кеп елугъагъан зоб аврувлагъа багъышлангъан илму ишини уьстюнде мекенли кюйде ишлей. Ачыкъ этип айтсакъ, диссертациясында ол Темиркъазыкъ Кавказда бу аврувланы яйылмагъыны аслу себеплерин токъташдырма ва ону алдын алма болагъан елларын герсетме бажара. Ону хас оппонентлери – дюньягъа белгили алим, медицина илмуланы доктору, профессор, Савлукъ сакълавну дюнья къурумуну эксперти Г.А.Герасимов ва ич аврувланы профессору, медицина илмуланы доктору И.А.Шамов Л.Алиеваны илму ишине оьр багьа бергенлер. 2006-нчы йылда ону уьстюнлю кюйде якълап, ол медицина илмуланы кандидаты деген атгъа ес бола.

2010-нчу йылда Лейлагъа бирдагъы да къысмат буюруп, ол Дагъыстангъа къайтма борчлу бола. Л.Алиева Дагъыстан медицина академиясында эндокринология кафедраны ассистенти этилип белгилене. Сонг да, бир вакътини ичинде Магьачкъалада темир елну къуллукъчуларыны больницасында да иш гере. Аз заманны ичинде Лейла дарс беривчюлени ва студентлени арасында яхшы абур къазана.

Айтылынып гелеген кюйде, савлукъдан уллу байлыкъ да, билимден артыкъ хазна да екъ дегенлей, Лейла Токътахановна билимни елунда. Бугюнлерде ол докторлукъ илму ишини уьстюнде ишлеп тура. Лейла бир нече керенлер билимлерин Москвада ва башгъа шагьарларда камиллешдирген. Дагъы да ол касбусуна байлавлу халкъара конгресслени ва конференцияланы ортакъчысы. Айтагъаным, шоларда ортакъчылыкъ эте туруп, ол Берлинде, Москвада, Ростовда, Кисловодскиде, Ставропольда ва башгъа шагьарларда болгъан. Бугюнлерде де, шу материалымны уьстюнде ишлеп турагъан вакътимде, Л.Алиева Москва шагьаргъа шекер аврувгъа байлавлу юрюлген YI конгресинде ортакъчылыкъ эте. Медицина илмуланы кандидаты Лейланы онда этген докладына, озокъда, касбучуланы янындан яхшы къыймат да берилген.

Л. Алиеваны гьакъында медицина академияны эндокринология кафед­расыны доценти, охув белюгюню заведующийи Камал Гьажиевич Камалов булай дей:
– Буссагьатгъы вакътиде мен ону булан бир кафедрада ишлеймен. Биз ону ишлейген кююне де разибиз. Халкъ арада айтылынып гелеген кюйде, инсанны эдеби алтындан артыкъ. Шолай да, ол уллугъа болсун яда гиччиге эдепли, гьюрметли янаша. Лейла биз барыбыз да абур этеген иш елдашыбыз. Булай адамлар булан ишлеме тынч ва рагьат бола. Ол къайда ва не ерде ишлесе де, огъар берилеген къыймат, озокъда, бизин сююндюрмей къоймай.

Лейла ишлейген больницада шекер авруву булан ятагъан Сакинат Магьамматова оьзюн багъагъан врачыны гьакъында булай хабарлай:
– Магъа 45 йыл бола. Оьзюм де Магьачкъалада яшайман. Магъа больницада кеп ятма тюше. Шо саялы да мен Лейла Токътахановнаны яхшы таныйман. Болгъан чакъы мен ол къарайгъан палатагъа тюшме гьаракат этемен. Бары да аврувлагъа ол бир кюйде, оьзюню адамына йимик арив сейлеп, гьайлы янаша. Биз огъар, озокъда, гьюрмет де этебиз ва кеп де сюебиз. Магъа этген къуллукъланы мен бир де унутмажакъман. Огъар Аллагь савлукъ берсин.

Лейла Токътахановна татывлу ожакъ къуруп яшай. Кеп сюеген уьягьлюсю булан оьсюп гелеген къызы Тамиланы тарбиялай.
Оьзюне бек арив ярашагъан уьстюндеги акъ халатдай таза, адилли кюйде яшайгъан Лейла Алиевагъа, тувгъан гюню булан да къутлай туруп, огъар савлукъ ва халкъ арада пайдалы ва абурлу ишинде гележекде уьстюнлюклер ерама, юрегине тутгъан муратларына етишме насип болсун демеге сюебиз.



Хадижат Жанболатова

© yoldash.ru




    15 Jun 2013 |   Баянлыкъ: 0 | Къаравны санаву: {view}


 
 


Content Management Powered by CuteNews